लाडकी बहीण योजना अडचणीत, हजारो महिलांचा लाभ बंद

Siddhi News: मासिक १५०० रुपयांचा दिलासा देणारी ‘लाडकी बहीण योजना’ सध्या अडचणीत आली आहे. राज्यभरात हजारो महिलांना या योजनेपासून वंचित व्हावं लागणार आहे.

लाडकी बहीण योजना योजना कशी सुरू झाली?

महाराष्ट्र सरकारने १८ जून २०२४ रोजी अर्थसंकल्पात ‘मुख्यमंत्री माझी लाडकी बहीण’ ही महत्वाकांक्षी योजना जाहीर केली होती. गरजू महिलांना दरमहा १५०० रुपये आर्थिक मदत देऊन त्यांच्या आयुष्यात स्थैर्य आणण्याचा या योजनेमागचा उद्देश होता.

शहरी आणि ग्रामीण भागात महिलांमध्ये या योजनेला जबरदस्त प्रतिसाद मिळाला होता. लाखो महिलांनी नोंदणी केली आणि खात्यात थेट रक्कम जमा होऊ लागली.

पण आता का थांबतोय लाभ?

मागील काही महिन्यांपासून सरकारने योजनेत अर्जांची छाननी सुरू केली. विशेषतः आयकर विभागाच्या तपासणीत असे दिसून आले की अनेक महिलांनी चुकीची माहिती देऊन अर्ज सादर केले आहेत.

जालना जिल्ह्यात सर्वाधिक फटका

जालना जिल्ह्यात तब्बल ५७ हजार अर्ज अपात्र ठरले आहेत. मुख्य कारणं पुढीलप्रमाणे:

अर्जदाराचं वार्षिक उत्पन्न २.५ लाखांहून अधिक

कुटुंबातील सदस्य शासकीय नोकरीत

चारचाकी वाहनाचा वापर

इतर शासकीय योजनांचा लाभ आधीपासून सुरू

वयोमर्यादेच्या बाहेर असलेले अर्जदार

या सगळ्यामुळे संबंधित महिलांना योजनेचा पुढील लाभ मिळणार नाही, असं अधिकृतरित्या जाहीर करण्यात आलं आहे.

नागपूर जिल्ह्यात ३० हजार अर्ज रद्द

नागपूर जिल्ह्यातही मोठ्या प्रमाणात अर्ज फेटाळले गेले आहेत. जवळपास ३० हजार महिलांचे अर्ज प्राथमिक पडताळणीत बाद झाले.
यात प्रामुख्याने आयकर भरणाऱ्या कुटुंबातील महिला, कारधारक महिला आणि इतर शासकीय योजनांचे लाभार्थी यांचा समावेश आहे.

महिलांमध्ये नाराजीचा सूर

योजनेच्या माध्यमातून मिळणाऱ्या १५०० रुपयांनी घरखर्चाला थोडा आधार मिळत होता, असं अनेक महिलांचं म्हणणं आहे. पण आता अचानक अर्ज बाद झाल्यामुळे अनेकांना मानसिक व आर्थिक धक्का बसला आहे.

काहींनी तर योजनेतून स्वतःहूनच नाव मागे घेतलं आहे – जालना जिल्ह्यात ६५ महिलांनी ही भूमिका घेतली.

अजून पडताळणी सुरूच

सध्या राज्यभरात अर्जांची पडताळणी सुरू आहे. त्यामुळे अजूनही बरेच अर्ज अपात्र ठरू शकतात, अशी शक्यता आहे. त्यामुळे या योजनेचा लाभ घेणाऱ्या महिलांमध्ये अस्वस्थता वाढली आहे.

लाडकी बहीण योजना ही अनेक महिलांसाठी मोठा दिलासा ठरली होती. मात्र तपासणीच्या नावाखाली अचानकपणे अर्ज बाद केल्याने महिलांची अडचण वाढली आहे.
सरकारने गरजू आणि पात्र महिलांपर्यंत योजना पोहचवण्यासाठी आणखी पारदर्शक पद्धतीने काम करावं, अशी मागणी आता उचलून धरली जात आहे.

तुमचं नाव लाडकी बहीण योजना मध्ये आहे का? अर्ज फेटाळला गेला का? तुमचा अनुभव आम्हाला कमेंटमध्ये जरूर सांगा!

वाचा: सुप्रीम कोर्टाने निकाल बदलला! १२ वर्षीय मुलाच्या भावना जिंकल्या