हनी ट्रॅपने सरकार उलथवले – संजय राऊतांचा आरोप

सरकार उलथवण्यासाठी ‘हनी ट्रॅप’? संजय राऊतांचा खळबळजनक दावा
मी सगळे व्हिडीओ पाहिले आहेत… हे फक्त सुरुवात आहे! — संजय राऊत

Siddhi News: राज्यसभेचे खासदार आणि शिवसेनेचे (उद्धव बाळासाहेब ठाकरे गट) प्रमुख प्रवक्ते संजय राऊत यांनी सोमवारी एक खळबळजनक आरोप करत महाराष्ट्रातील राजकारणात खदखद निर्माण केली आहे. त्यांनी दावा केला की, महाविकास आघाडी सरकार पाडण्यासाठी ‘हनी ट्रॅप’ चा वापर झाला, आणि त्याचे पुरावे लवकरच समोर आणले जातील.

हनी ट्रॅपचा वापर करून आमदार-खासदार फोडले?

राऊत यांच्या म्हणण्यानुसार, 15 आमदार आणि 4 खासदार हनी ट्रॅपमध्ये अडकले होते. त्यांना जाळ्यात ओढून सरकारच्या विरोधात वळवलं गेलं. राऊत यांनी यासंदर्भात काही व्हिडीओज आणि फोटोज असल्याचा उल्लेख करत “मी सगळे व्हिडीओ पाहिलेत” असं ठामपणे सांगितलं.

‘सीडी’च्या बदल्या आणि गुप्त भेटी

सत्तांतरणाच्या काळात, देवेंद्र फडणवीस आणि एकनाथ शिंदे यांच्यामध्ये रात्री गुपचूप बैठका झाल्याचे आधीच समोर आले आहे. त्यावर राऊत म्हणाले की, “ते हुडी घालून जे जात होते, ते सीडीचं आदान-प्रदान करायला जात होते.”

तसंच, मरीन लाईन्सच्या पुलाखाली झालेल्या एका गुप्त बैठकीत काही सीडी दाखवण्यात आल्याचंही त्यांनी नमूद केलं.

‘नाव फडणवीस असलं तरी संस्कार दिसत नाहीत’

राऊत यांनी भाजपवर टोकाची टीका करत म्हटलं की, “लोढा नावाच्या व्यक्तीने भाजपच्या काही मंत्र्यांना आणि फुटलेल्या खासदारांना हनी ट्रॅपमध्ये अडकवलं. त्यांचे फडणवीसांसोबत फोटोही आहेत. लोढाचा पेनड्राईव्ह शोधल्यास अनेक धक्कादायक गोष्टी उघड होतील.”

भाजप महिला आघाडी कुठे गेली?

एका प्रसंगाचा उल्लेख करत राऊत म्हणाले, “मंत्र्याच्या बारमधून महिलांना पकडलं गेलं… पण भाजपच्या महिला पुढे का आल्या नाहीत? हे सरकार महाराष्ट्राला कलंकित करतंय.”

व्हिडीओ, फोटो आणि पुरावे

संजय राऊत यांनी आपल्या एक्स (ट्विटर) अकाऊंटवर एक फोटो पोस्ट केला आहे, ज्यात गिरीश महाजन पेढा खात असताना दिसत असून, त्यांच्या शेजारी प्रफुल्ल लोढा असल्याचा दावा व्यक्त केला जात आहे. त्यांनी म्हटलं – “CBI चौकशी झाली पाहिजे. दूध का दूध, पाणी का पाणी होईल!”

हनी ट्रॅप म्हणजे नेमकं काय?

हनी ट्रॅप म्हणजे एखाद्या व्यक्तीला लैंगिक/भावनिक पद्धतीने फसवून त्याचं छुपं चित्रिकरण केलं जातं, आणि त्यानंतर त्याचा वापर करून ब्लॅकमेल केलं जातं. राऊत यांच्या म्हणण्यानुसार, अशाच प्रकारे अनेक नेत्यांना फसवण्यात आलं.

वाचा: शिंदे सरकारमागे हनीट्रॅप? विजय वडेट्टीवारांचा गौप्यस्फोट

पुढील ‘गौप्यस्फोटा’कडे राज्याचं लक्ष!

संजय राऊत यांनी या प्रकरणात आणखी मोठा खुलासा लवकरच करणार असल्याचं सूचित केलं आहे. राज्यातील राजकारण पुन्हा एकदा अशांत होत असताना, या आरोपांची सखोल चौकशी होईल का? हे पाहणं महत्वाचं ठरणार आहे.

तुमचं मत काय? हनी ट्रॅप प्रकरणात खरी बाजू समोर यावी असं वाटतं का? खाली कमेंट करून सांगा आणि बातमी शेअर करा!