देवी अहिल्याबाई होळकर यांच्यावर चित्रपट; छावा नंतर मराठ्यांचा गौरव पुन्हा झळकणार

CM फडणवीस यांनी देवी अहिल्याबाई होळकर यांच्या जीवनावर चित्रपटाची घोषणा केली. ‘छावा’नंतर मराठा इतिहास पुन्हा पडद्यावर.

महाराष्ट्राच्या इतिहासातील अजोड स्त्री शासनकर्ती – देवी अहिल्याबाई होळकर – यांचं जीवन आता मोठ्या पडद्यावर झळकणार आहे. राज्य सरकारनं या ऐतिहासिक चित्रपटाची घोषणा केली असून, यामुळे मराठ्यांचं शौर्य पुन्हा एकदा जनतेसमोर उभं राहणार आहे.

शनिवारी, पुण्यश्लोक अहिल्याबाई होळकर यांची ३०० वी जयंती मोठ्या उत्साहात साजरी झाली. अहिल्यानगर (पूर्वीचं अहमदनगर) जिल्ह्यातील चौंडी येथे झालेल्या या कार्यक्रमात मुख्यमंत्री देवेंद्र फडणवीस आणि उपमुख्यमंत्री एकनाथ शिंदे यांनी उपस्थिती लावली. यावेळीच फडणवीस यांनी या चित्रपटाच्या घोषणेनं सगळ्यांचं लक्ष वेधून घेतलं.

“छावा” प्रमाणेच, “देवी अहिल्याबाई होळकर” सुद्धा होणार भव्य

मुख्यमंत्री फडणवीस म्हणाले, “जसं छत्रपती संभाजी महाराजांचं शौर्य ‘छावा’ या चित्रपटातून दाखवण्यात आलं, तसंच देवी अहिल्याबाईंचं दूरदर्शी आणि लोककल्याणकारी राज्य ‘या’ नव्या चित्रपटातून दाखवलं जाईल.”

“छावा” या चित्रपटाला जशी उत्स्फूर्त दाद मिळाली, तशीच प्रतिक्रिया या चित्रपटालाही अपेक्षित आहे, असंही त्यांनी ठामपणे सांगितलं.

अहमदनगरचं नामांतर – अहिल्याबाईंना सन्मान

राज्य सरकारने अहमदनगर जिल्ह्याचं नाव या अगोदरच अधिकृतपणे “अहिल्यानगर” असं केलं आहे. फडणवीस म्हणाले की, पंतप्रधान मोदींनाही या कार्यक्रमाचं आमंत्रण दिलं होतं, आणि त्यांनीही देवी अहिल्याबाईंच्या कार्यभूमीला अभिवादन करण्याचा मानस व्यक्त केला.

पुण्यश्लोक अहिल्याबाईं होळकरांचा  पराक्रम आणि सामाजिक भान

फडणवीस यांनी अहिल्याबाईंचं राजकीय, सामाजिक आणि धार्मिक योगदान अधोरेखित केलं. त्यांनी सांगितलं की:

अहिल्याबाईंनी २८ वर्षं न्यायपूर्ण राज्य केलं.

त्यांनी तोफखाना उभारून राज्याचं संरक्षण केलं.

सोमनाथ मंदिर नष्ट केल्यावर, त्यांनी त्याजवळ दुसरं मंदिर उभारून हिंदू जनतेला प्रेरणा दिली.

दहेज प्रथा रोखण्यासाठी कडक धोरणं राबवली.

या चित्रपटाबद्दल अजून तपशील (दिग्दर्शक, कलाकार इ.) जाहीर झालेले नाहीत, पण याची निर्मिती सरकारी पातळीवर होणार असल्याने, एक भव्य ऐतिहासिक चित्रपट पाहायला मिळेल, अशी अपेक्षा आहे.

मराठा इतिहासात देवी पुण्यश्लोकअहिल्याबाई होळकर हे नाव सामर्थ्य, विवेक आणि न्यायाचं प्रतीक आहे. ‘छावा’ नंतर या नव्या चित्रपटामुळे ती प्रेरणा नव्या पिढीपर्यंत पोचेल, यात शंका नाही.